أم دمعة وجوز الغربان

 

الدبور دخل ينام ، ولسه جاى يحط دماغه على المخدة ، دخلت عليه النحلة مراته وهى بتصرخ ، يا أبو الدبابير ، يا حبيبى أنت فين ، رد عليها الدبور وهو مستاء من صوتها العالى ، تعالى أنا هنا ربنا يخدك ، أرغى عايز أنام ، بص يا دبورى ، فاكر حكاية أم دمعة وجوز الغربان اللى حكيتلك عليها قبل كده ، أيوه فاكر مالهم يا ولية.

طبعاً ، أنا قلتلك أن أم دمعة بتحارب عشان الغراب الطويل ياخد مكانها ، طبعاً أنت عارف ليه ، هوأنا مخى دفتر يا وليه قوليلى أنت ليه ،  يا عليك يا أبو الدبابير ده أنت ضايع خالص ، طبعاً عشان يغطى على بلويها ، أى حد غيره هتروح فى السكسونيا ، الدبور نهض من نومه والغضب ظهر على وجهه ، أنت باين عليكى فاضيه ، طب ما أنت قولتيلى الحكاية دى قبل كده أيه الجديد بقه.

 

عشان تصدق أن مراتك مش ساكتة وبتعرف كل حاجة ، الغراب الطويل ده بقه ناس ولاد حلال جابوا تاريخه الأسود وناويين كده يستخدموه فى الوقت المناسب عشان ينطروه ماهى مش ناقصه فقر يا أبو الدبابير ، أنت تعرف يا دبورى ، حتى الورطة اللى وقع نفسه فيها من زمان جابوها برضو ، ورطة أيه يا منبع النكد.

 

 بص يا سيدى الغراب ده لهف فلوس 3 مهندسين ،  بعد ما نهب العهدة كلها اللى كانت معاه ، والناس راحت اشتكته فى النيابة ، ولولا تدخل البعض عشان عياله وأسرته ، كان دخل السجن وتم طرده للشارع ، ورغم كده يا دبورى مكلفوش نفسهم واستبعدوه من منصبه كعقاب ليه وسابوه يستكمل تاريخه الأسود ، ده مش كده وبس أنت عارف استغل مكانه فى ......، يا وليه حرام عليكى كفاية كده عايز أنام ، كمليلى الحكاية دى بعدين ، ماشى يا دبورى ، تصبح على خير بوسه بقه لنحلتك حبيبتك ، أممممممه.